Taga GSP supak menteryo tukoron

CEBU, Philippines - Ang mga dagkong opisyal sa rehiyonal nga buhatan sa Girl Scout of the Philippines (GSP) mipadayag og pagsupak sa sugyot ni Kongresista Tomas Osmeña sa habagatang distrito sa dakbayan sa Sugbo nga himoong menteryo ang 4.2 ka ektarya nga yuta nga iya sa Osmeña Shrine sa Barangay Kalunasan ning dakbayan sa Sugbo.

Ang maong pagsupak nahimutang sa usa ka suwat nga giduso sa GSP ngadto sa Konseho sa siyudad sa Sugbo.

Sayo niini gipadayag ni Mayor Michael Rama nga ang tingog sa katawhan maoy masunod busa angayan kini nga respetohon.

Ang Regional Executive Director Aida Saromines   sa GSP miingon nga doul ra kaayo sa ilang kampo ang maong dapit busa dako silang supak kay sila nabalaka nga maapektohan   sa duga sa lawas sa tawo ang tinubdan nila sa tubig.

“We are opposing in having a cemetery near our training center and camping site for this will not only contaminate our source of water but also will spoil the beautiful scenery of the place,” matud pa ni Saromines.

Gawas sa GSP, misupak usab sa maong proyekto ang Beverly Glen Homeowners Association ingon man usab ang mga residente sa Barangay Kalunasan.

Ang sugyot sa pagtukod og menteryo alang sa dili mga Katoliko gihimo ni Osmeña tungod kay nalantaw niya nga kasagaran sa mga miyembro sa ubang relihiyon nga dili Katoliko walay menteryohan dinhi.   - BANAT NEWS