Sugbo moduyog sa kasaulogan sa Independence Day

CEBU, Philippines - Ang kagamhanan sa lalawigan sa Sugbo moduyog usab sa nasudnong paghandum sa Adlaw sa Kaugalingnan karong adlawa Hunyo 12, 2011.

Ang Kalayaan 2011, maoy ika-113 nga kasaulogan sa Proklamasyon sa Kaugalingnan sa Pilipinas nga may tema nga "Kalayaan: Paninindigan ng Bayan" ug pangunahan ni Provincial Administrator Eduardo Habin sa ngalan ni Gobernador Gwendolyn Garcia.

Kauban sa maong kalihukan mao ang mga sakop sa hunta probinsiyal, mga department head sa Kapitolyo ug mga opisyales sa nagkadaiyang mga nasudnong ahensya sa kagamhanan nga ania magbase sa Sugbo.

Sigun sa buhatan ni Gobernador   Garcia, ang kagamhanan sa lalawigan sa Sugbo makighiusa sa "simultaneous Flag-raising and wreath laying Ceremonies" nga gitakdang himuon sa kaulohan ug sa tanang mga local government unit sa tibuok nasud.

Ang maong kasaulogan ipahigayon sa Kapitolyo, nga pagasugdan pinaagi sa presentasyon sa bandilang Pilipinhon nga pangunahan ni ABC provincial federation president Provincial Board member nga si Jose Ribomapil Holganza ug Provincial Administrator Eduardo Habin. Ang flag raising ceremony pangunahan gihapon ni bokal Holganza ug Habin nga sundan sa pag-awit sa nasudnong awit.

Inighuman og awit sa Philippine National Anthem, isunod usab ang "panunumpa ng Katapatan sa Watawat ng Pilipinas" nga pangunahan sa tanang mga department head sa Kapitolyo.

Ang wreath-laying ceremony ipahigayon usab sa atubangan sa Statue of Lapu-lapu nga nahimutang sa atubangan sa Provincial Capitol Building   nga maoy motak-op sa hamubo ug yano nga seremonyas. (WC)  (BANAT NEWS)