Gitaktak nga prinsipal padayon sa trabaho - Denuyo

CEBU, Philippines - Ang kanhi prinsipal sa Talisay City Central School (TCCS) kinsa gimandoan sa Ombudsman for the Visayas tungod sa dishonesty ug falsification of documents nga taktakon gikatahong padayon gihapon sa iyang pagserbisyo sa Tanke Elementary School isip prinsipal.

Si Talisay City Division Superintendent Woodrow Denuyo nagkanayon nga wala pa sila makadawat sa kopya sa official communication gikan sa rehiyonal nga buhatan sa Department of Education (DepEd) ug sa kamandoan sa Ombudsman.

Matud pang Denuyo ang regional director ug siya (Denuyo) igo lang mo-serve sa order.

Si Denuyo mibutyag usab nga si Maria Lourdes Ipong ang kanhi prinsipal sa TCCS mianha na sa iyang buhatan ug nagsusi kabahin sa nahisgutang desisyon sa Ombudsman.

Si Ipong gihatagan og lima ka adlaw sa pagsumitir sa iyang motion for reconsideration kabahin sa nahisgutang desisyon.

Sa pila ka tuig sa iyang serbisyo isip prinsipal sa TCCS niadtong Nobiyembre sa milabay’ng tuig si Ipong nabalhin isip prinsipal sa Tanke Elementary School. 

Si Denuyo sa iyang bahin, nagkanayon nga sa pagkakaron dili una siya mo-conclude nga sad-an gyud si Ipong sa mga pasangil batok kaniya.

Matud usab ni Denuyo nga ang maong insidente nahitabo dihang wala pa siya molingkod isip Division Superintendent sa Talisay niadtong Disyembre 2009. Tungod sa maong insidente si Denuyo mipahimangno sa tanang mga prinsipal sa mga tunghaan sa Talisay nga dili magpataka og pirma og mga dokumento ilabi na kung nalambigit og kwarta.

Kahinumduman nga ang mga opisyal sa Talisay City Swimming and Life Saving Association, Inc. (TCSLSAI) nga girepresentahan ni Alfie Fernandez miduso og reklamong malversation of public funds, dishonesty ug falsification of documents batok kang Ipong sayo niadtong tuig 2007.

Ang grupo mipasangil kang Ipong nga nakadawat og P12,600 nga reimbursement gikan sa kagamhanan sa Talisay diin ang maong kwarta gigahin unta og pamalit og mga swimsuit sa mga swimmers sa moapil og kompetisyon sa Central Visayas Regional Athletic Association (CVRAA) ngadto sa Tagbilaran City niadtong tuig 2006.

Apan giingong namakak si Ipong kanila nga wala mohatag og pundo ang kagamhanan sa siyudad hinungdan nga ang mga ginikanan sa mga swimmers mao nay mipalit og mga swimsuit gamit ang kaugalingon nilang kwarta. (BANAT NEWS)