Ex-professor naghikog

CEBU, Philippines - Usa ka kanhi professor sa usa ka unibersidad sa Dipolog City ang napalgang patay ug gidudahang naghikog sulod sa usa ka kubol sa sulod sa Cebu City City Jail diha sa barangay Kalunasan ning dakbayan kagahapon sa buntag.

Si Samuel Mabida Jr., 50, molupyo sa San Carlos City ug usa ka kanhi magtutudlo sa Andres Bonifacio College sa Dipolog City ang nagkutlo sa iyang kinabuhi ginamit ang gisumpay-sumpay nga t-shirt niini.

Nasayran nga napalgan nalang si Mabida nga walay kinabuhi sulod sa kubol niini sa maong bilanggoan human sa pagpangita sa mga jailguards tungod kay kulangan na ang mga bilanggo atol sa ilang ‘bilang’ kon ihap pagkabuntag nga normal nang buhaton matag buntag.

Si Insp. Eric Relucio, ang deputy jailwarden for administration sa maong bilanggoan sa pakighinabi sa Banat News sa telepono kagahapon nagkanayon nga walay namatikdang katingad-an sa linihukan ni Mabida nga gi-report kanila sa ubang inmates.

Gani matud pa niya nga nakatambong pa kini sa uwahing hearing sa iyang kaso niadtong milabay’ng bulan. Si Mabida nabilanggo sa kasong estafa ug illegal recruitment.

Matud pang Relucio nga base sa iyang nasabtan sa suicide note niini daw naguol kini sa iyang sitwasyon karon sanglit aduna siyay mga anak nga kinahanglang suportahan.

“Murag katong problema niya sa iyang pagkapriso, sa akong nasabtan kanang iyang problema sa pagka-father sa iyang mga anak nga siya nakakulong,” matud pang Relucio.

Ang asawa ni Mabida nga si Shobe Jane gipatawag nalang sa kadagkoan sa maong bilanggoan diha sa ilang buhatan ug gipahibalo kabahin sa nahitabo.

Ang Homicide Section sa Cebu City Police Office nakakuha og unom ka pahinang suicide note ni Mabida, usa ka yellow t-shirt ug usa ka sweatshirt nga maoy iyang gihimong pisi nga gihikot sa iyang liog aron magbitik.

Usa ka inmate nga si Ronald Samella kinsa padulong unta sa pikas nga building maoy nakasigpat sa patay’ng lawas ni Mabida nga nagbitay na hinungdan nga dali niyang gipahibalo ang mga jailguards.

Ang jail nurse nga si JO1 Manuel Ygay daling miresponde sa maong kubol apan patay na kini. Ang mga sakop sa Homicide Section pinangulohan ni SPO4 Alex Dacua pag-abot sa maong prisuhan miingon nga naa na sa ubos ang patay’ng lawas ni Mabida human gitangtang sa mga awtoridad sa maong bilanggoan nga misuway unta pagsalbar niini.

Matud pa nga sukad nga kini nabilanggo pito na ka buwan ang nakalabay kanunay na kining nagpadungog-dungog nga wala na siyay silbi o gamit sa iyang pamilya.

Ang kaso niadto pang 2006 gisang-at ug gipasanginlan si Mabida nga maoy middleman sa pagpang-recruit og mga mamahimong Special Education teachers alang sa San Francisco, USA.

Misamot ang kaguol ni Mabida nga siya lang ang gipasakaan og kaso samtang ang tinuoray nga nagsugo kaniya wala pasaka-i og tukmang kaso.

Sa laing bahin, usa ka Lantrod Devebar, 18, nga taga sitio Cabantan barangay Barrio Luz ning dakbayan ang napalgang patay nga nagbitik og pisi diha sa iyang liog sulod sa iyang lawak kagahapon sa buntag.

Babaye ang gituohang hinungdan sa paghikog niini sumala pa sa report sa DySS gikan ni Roland nga igsuon sa namatay.(EIM)  (BANAT NEWS)