Gisanggot sa bilas kritikal

CEBU, Philippines -  Natabas-tabas ang lawas sa 41 anyos nga lalaki human kini tigbasa og sanggot sa mananggiti nga iyang bilas didto sa barangay Saksak sa lungsod sa Aloguinsan niadtong Huwebes sa alas 6:00 sa hapon.

Ang biktima mao si Juanito Abasolo, 41, minyo, nga nagpuyo sa nahisgutang lugar samtang ang suspek mao ra usab ang iyang bilas nga si Maximo Crasty, 37, minyo, mananggiti ug silingan sa biktima.

Si PO2 Stephen Tibon sa Aloguinsan Police mibutyag sa Banat News nga ang biktima giatake sa suspetsado sulod sa iyang balay pinaagi sa sanggot diin pipila sa mga dagkong samad niini mao ang sa iyang ulo ug buko-buko.

Apan bisan pa og samaron nakadagan ang biktima ug midangop sa mga tanod sa barangay sa Minolos , kinsa mao usab ang misikop sa suspetsado.

Nasayran nga sa sayo pa nga nag-inom ang biktima ug ang suspek   ug dihang nangalasbag na, nahitabo ang panaglalis sa duha nga misangpot sa pagpanigbas.

Ang biktima didto dad-a sa Barili District Hospital samtang ang suspek nagpahayahay na sulod sa prisohan. (BANATNEWS)