Road load limit sa lalawigan higpitan

CEBU, Philippines - Gimandoan ni Gov. Gwendolyn Garcia ang provincial treasurer, Atty. Roy Salubre, sa pagpahigayon og checkpoints sa kadalanan sa lungsod sa Pinamungajan hangtud sa lungsod sa San Fernando.

Kini aron pag-implimentar sa road load limit ngadto sa mga karga sa trak de karga nga manguha og mga filling materials gikan sa mga quarry operation sa kalungsuran.

Si Atty. Roy Salubre nagkanayon nga ang kamanduan sa gobernador kabahin kini sa katumanan sa ordinansa sa probinsiya nga naglimita sa 6 cubic meters kon 10 ka tonelada lang nga karga sa dagkong mga trak.

Kini aron mapreserbar ug dili daling mangaguba ang mga kadalanan sa probinsiya sa Sugbo. Si Salubre miingon nga bisan pa man og ang mga nag-quarry nipasalig kang Garcia nga tumanon ang load limit mas buot sa gobernador nga masusi kini. (BANATNEWS)