Dalan sa Banawa gihimong parkingan

CEBU, Philippines - Usa ka dalan sa sitio Banawa sa barangay Guadalupe sa siyudad sa Sugbo ang gireklamo sa usa ka concerned citizen dinhi sa Banat News gumikan kay naglisod na sila pag-agi gumikan sa kadaghang mga dagkong sakyanan nga i-parking ug sa gipangtukod nga mga barong-barong.

Ang dalan nga gireklamo mao ang 968 V. Rama Extension sa nahisgutang barangay nga gihimo nang kargahanan ug diskargahanan sa mga produkto sa pipila ka mga negosyanteng nagpuyo sa maong lugar.

Gawas pa niini, duna pay daghang mga payag-payag ug dugangan pa nga kanunay dunay hayaon diha sa gamay’ng kapilya daplin sa dalan nga matud pa niya ang uban wala nila mailhi ug katunga sa dalan maoy okupahon sa mga nagbangotan.

Ang mireklamo nga dili buot magpahingalan dul-an na sa 50 ka tuig nagpuyo sa maong dapit. Matud pa niya sa Banat News makadaghang higayon na siyang nagbalik-balik sa barangay hall ug mireklamo apan wala gyud kini himoi og aksyon.

Gawas sa mga sakyanang kargahanan og produkto gihimo sad kining parkingan sa nagkalain-laing mga pasaheroan panahon sa kagabhion ug aduna say gibutang nga basketball goal nga makabalda sa mangagi kung adunay magduwa.

“Ambot, wala ko kasabot, mireklamo nako ana sa barangay, wala paman nila duawa ang location,” matud pa niini kinsa nabalakang panahon unya kung dunay sunog maglisod og sulod ang mga bombero.

“Hinaut unta nga tagaan lang unta nila og tarong nga dalan kay maglisod gyud mi og agi. Ang uban kay magpuwesto na sa ilang mga negosyo sa dalan, asa naman lang mi moagi?”

“Nagbayad baya ‘ta sa saktong buhis, hinaut unta nga matagaan unta ta og saktong serbisyo sa gobiyerno bisan kana lang nga simple nga butang,” panapos pa sa reklamante.(EIM) (BANATNEWS)