Pamilya sa Engr. nga gidagit nabalaka

CEBU, Philippines - Ang mga sakop sa pamilya ni Engineer Virgilio Fernandez kinsa gidagit didto sa Lamitan City, lalawigan sa Basilan niadtong Biyernes gibati na og kabalaka tungod kay wala pa sila’y nadawat nga kasayoran bahin sa gidangatan karon sa biktima. Base sa report sa TV Patrol Central Visayas nga wala usab makadawat og mensahe ang pamilya gikan sa mga midagit nga nangayo og lukat o “ransom”.

Samtang si Gobernador Gwendolyn Garcia giingong nagpaabot lang moduol kaniya ang pamilya ni Fernandez aron mangayo og panabang.

Kini human niya hisayri nga nagplano ang pamilya ni Fernandez nga mangayo og panabang kaniya ug kang Mayor Socrates Fernandez sa dakbayan sa Talisay kinsa ig-agaw ni Engr. Fernandez.

Si Fernandez nga taga sitio Ingles, barangay Guadalupe sa dakbayan sa Sugbo nagtrabaho isip project engineer sa Mace Construction sa Lamitan City dihang gidagit kini sa armadong mga tawo. (BANAT NEWS)