Ahente sa softdrinks gitulis sa nag-motor

CEBU, Philippines - Laing ahente sa softdrinks ang nasakmitan og P23 mil sa mga tulisang de motor didto sa barangay Poog, dakbayan sa Toledo sa miaging hapon.

Ang mga biktima mao sila si Alan Arcilla Agustina, 45, sales agent sa Fortuna Trading nga nagbase sa Wireless sa dakbayan sa Mandaue ug ang iyang kauban nga si Junjun Adelita, 26, sa mao gihapong dakbayan. Sa pasiunang imbestigasyon nila ni PO2 Jun Ian Alqueza ug PO1 Emmanuel Aragon sa Lutopan Sub-station nagbutyag nag-parking ang delivery van   sa mga biktima atubangan sa tindahan sa usa ka Jane’s Store sa Lutopan.

Apan kalit lang miabot ang duha ka motorsiklo nga walay mga plate number nga gisakyan sa duha ka tulisan.

Ang usa sa duha ka tulisan nanaug sa iyang motorsiklo nga nagdala og armas de fuego ug miduol kang Agustina uban sa pagdeklarar nga tulis hinungdan nga gihatag dayon sa biktima ang iyang koleksyon nga P23 mil ug iyang Nokia cell phone.

Human makuha ang kuwarta nag-iyahay ang duha ka tulisan padagan sa ilang motor pahilayo sa maong lugar. (BANAT NEWS)