Bag-ong pre-school building gisubhan

CEBU, Philippines -  Dungan sa pag-abli sa klase karong tuiga, pormal usab nga gisubhan ang usa ka edipisyo alang sa mga nagtungha sa pre-school sa barangay San Vicente, isla sa Olango kagahapon sa buntag.

Ang maong edipisyo usa ka proyekto sa kagamhanang lokal sa dakbayan sa Lapulapu ug sa usa ka Japanese firm nga midonar sa maong building ngadto sa kagamhanan.

Nasayran sa Banat News nga mobalor og P300 mil ang maong edipisyo nga kasudlan og ubay-ubay nga mga tinun-an sa pre-school

Gumikan sa abag sa Kane Package sa MEPZ uban sa ilang presidente nga si Yoshikasu Kanekasa ug ni Bise Presidente Seigo Yagi uban sa pagtugot ni Lapulapu City Mayor Paz Radaza natukod ang maong edipisyo niadtong Abril 28 ug nahuman niadtong Mayo 30 ning tuiga. Atol sa pormal nga inugurasyon si Konsehal Eduardo Cuizon ang Committee Chairman on Education sa konseho sa dakbayan sa Lapulapu maoy pormal nga midawat sa maong edipisyo.

Matud pa ni Kanekasa nga aduna pay laing proyekto nga ilang ihatag ngadto sa mga residente sa dakbayan sa Lapulapu alang sa edukasyon sa mga kabataan sa maong dakbayan.

Samtang si Cuizon mapasalamaton kaayo ngadto sa mga Hapon nga miabag sa kakulangan sa mga lawak klasehanan sa dakbayan sa Lapulapu ilabi na sa pre-school sa isla sa Olango. (BANAT NEWS)