Mga estudyante sa MCC midaghan

CEBU, Philippines -  Miusbaw karon ang gidaghanon sa enrolment sa duha ka Mandaue City College (MCC) nga nahimutang sa Mandaue City Sports and Cultural Complex sa sitio Tribunal, dakbayan sa Mandaue nga ubos sa pagdumala ni Dr. Susana Cabahug ug sa Tipolo Campus nga gidumala ni Dr. Paulus Marie Canete.

Si Dr. Cabahug miingon nga gikan sa 422 sa miaging tuig, sa pagkakaron nahimo nang 471 ang motungha karong tuiga.

Matud pa ni Cabahug nga ang nag-unang hinungdan sa pag-usbaw sa ilang tinun-an mao ang pagpamalhin sa mga estudyante nga nagtungha sa mga pribadong kolehiyo ug unibersidad.

Kini naglakip sa mga tinun-an nga gikan sa mga dagkong unibersidad ug kolehiyo sa dakbayan sa Sugbo kansang mga ginikanan dili na kapiog sa pagpaburot pag-ayo sa ilang matrikula.

Samtang si Dr. Canete nga maoy presidente sa MCC sa Tipolo campus nga nahinabi sa Banat News miingon nga daan na nilang gipaabot ang pag-usbaw sa gidaghanon sa mga tinun-an karong tuiga.

Busa ila kining gipangandaman pag-ayo pinaagi sa pagdugang og mga lawak saringan ug ingon man mga professor.

Gitataw ni Canete nga dako kaayo ang pag-usbaw sa ilang gidaghanon sa mga tinun-an karong tuiga ilabi na sa unang ang-ang sa kolehiyo tungod sa kabarato sa ilang matrikula nga tag P100 lamang ang matag unit.

Sa nasayran sa Banat News nga ang duha ka MCC sa Mandaue nga gidumala ni Dr. Cabahug ug Dr. Canete kasamtangang nagtanyag og mga kurso nga naglakip sa Bachelor of Elementary Education, Bachelor of Science and Education. Bachelor of Science and Industrial Technology, Hotel and Restaurant Management ug uban pa. (BANAT NEWS)