Mga risgong dapit gimarkahan

CEBU, Philippines -  Maklaro na ang mga lugar nga kuyaw ilabi na sa panahon sa ting-uwan ning dakbayan sa Sugbo pinaagi sa mga timaang “yellow line” nga gipabutang ni Mayor Michael Rama.

Kini tungod kay matud pa sa mayor nga dili matag-an ang panahon ilabi na nga iyang nabantayan nga nagsagunson na ang uwan busa iyang gimandoan ang Cebu City Disaster Risk Reduction and Management Council (CCDRRMC) nga gipangulohan ni Alvin Santillan nga pamarkahan og mga “yellow line” ang mga sapa, estero, ug kabukiran nga kuyaw sa landslide ug uban pang katalagman nga mokutlo og kinabuhi ug kabtangan.

Gipahimangnoan ni Rama ang publiko nga angay magmatngon sa kanunay ug sa pagbantay sa dagan sa panahon.

Nasayran nga misaka na usab ang giladmon sa tubig sa Mahiga creek sa milabay nga adlaw, butang nga nakapabalaka pag-ayo sa mayor.

‘Dili pa gani to bagyo, diha man gung dapita, baga na kaayo ang lapok unya kung kusog ang uwan, magpundo gyud ang tubig,” nagkanayon si Rama.

Dili gusto si Rama nga masubli ang dakong baha nga miigo sa siyudad niadtong Enero nga nakahatag og kahasol sa mga tawo ilabi na sa mga tinun-an ug mga trabahante. Gidasig usab niya ang publiko sa paghipos sa ilang mga basura aron dili kini moungot sa kanal nga maoy makapasamot sa lunop. (BANAT NEWS)