CEBU, Philippines - Gihulagway ni Cebu City Schools Division Superintendent Rhea Mar Angtud nga malinawon ug hapsay ang pagbukas sa klase sa pampublikong tunghaan kagahapon dinhi sa dakbayan sa Sugbu.
Apan giangkon ni Angtud nga duna pa’y ubang tunghaan ang naproblema sa kakuwang sa mga classroom gumikan sa kadaghan sa mga bata busa gimandoan na niya ang matag tunghaan nga gamiton ang mga school library o ba kaha ang principal’s office nga himuong temporaryong lawak sa mga bata.
Samtang gipadayag ni Angtud nga dako kaayo og natabang ang gihimong Brigada Eskwela gumikan kay tungod niini limpyo na ang mga tunghaan sa pagsugod sa klase kagahapon.
Si Bise Mayor Joy Augustus Young mapasalamaton usab sa tanang miboluntaryo sa Brigada Eskwela gumikan kay hapsay na daan ang pagtungha sa mga bata kagahapon ug iyang gipahibalo nga nagpadayon gihapon ang siyudad sa Sugbo sa anam-anam nga paghimo og mga proyekto sa nagkadaiyang tunghaan.
Matud pa ni Young nga nag-estorya na sila ni Angtud aron masayo ang pag-umol sa earthquake ug fire drill alang sa mga tinun-an.
Misugyot usab ang bise mayor nga kinahanglan nga sayuhon ang piniliay alang sa mga opisyales sa Parents ang Teachers Association aron aduna sila’y taas nga oras sa paghimo og mga programa nila sa eskwelahan. (BANAT NEWS)