Neat gibansay sa 505th 2nd SAR sa PAF

CEBU, Philippines - Malampusong gipahigayon sa mga miyembro sa Naga Emergency Action Team (NEAT) ang search and rescue drill sa mga 505th 2nd Search and Rescue Squadron sa Philippine Air Force.

Ang maong kalihukan gipahigayon diha sa dakung hawan sa atubangan sa city hall sa Naga sa barangay Poblacion niadtong Biyernes sa buntag.

Ang mga sakop sa NEAT mipahigayon sa heli-rappel gikan sa Huey-UH1H helicopter nga gipalupad sa gitas-ong 50 ka tiil ug gikan didto nag-rappel ang mga rescuers paubos gamit ang pisi.

Gawas sa heli-rappel dunay gipahigayon usab nga ‘low-and-slow deployment at sea’ nga ang mga rescuers gitapok sa dagat dayon gipakatkat sa pisi nga hagdanan padulong sa helicopter.

Si City Councilor Elmer Lapitan kinsa maoy lider sa nga rescuers nagkanayon nga tungod sa sunod-sunod nga pag-igo sa katalagman diha sa ilang lugar kasagaran pagdahili sa yuta hinungdan nga nagpaubos sila og bansay-bansay aron maandam sa mga pagabuhaton panahon sa emerhensiya.

Ang NEAT dunay 30 ka mga miyembro apan ang uban atoa na sa laing dapit aron manarbaho hinungdan 16 lang ang napaubos sa bansay-bansay duha sa mga miapil mga babaye nga sila si Joy Dejilias ug Vangie Cardinas.

Ang PAF mipahigayon usab og aerial survey ilabi na ngadto sa mga bukirang barangay sa Naga gamit ang duha ka MG-520 attack helicopter.

Sa laing bahin, sa maong adlaw si Mayor Valdemar Chiong mitunol sa P10 mil nga pinansiyal nga hinabang matag usa sa 26 ka pamilya nga biktima sa landslide sa baranay Naalad.

Matud ni Chiong nga ang kagamhanan sa probinsiya mihatag usab og mga gamiton sa balay lakip na bugas ngadto sa mga biktima. (BANAT NEWS)