Naigo sa saag nga bala

CEBU, Philippines - Naigo sa saag nga bala ang usa ka tawo mga alas-10 pasado ang takna sa miaging gabii sa sitio Kulo sa barangay Canjulao, dakbayan sa Lapulapu nga maoy hinungdan sa pagkaangol niini.

Si PO2 John Carlo Jocotan sa Homicide Section sa kapolisan sa maong dakbayan miila sa biktima nga mao si Enguilbert Berame, 31, nagpuyo sa sitio Sambag sa nahisgutang barangay sa maong dakbayan.

Matud pa ni PO2 Jocotan nga si Levideco Suan, nagpuyo sa maong dapit gikan nga nagpalit og ilimnon sa usa ka tindahan maoy unang nakasugat sa biktima nga nagkadugo na ang bukton sa samad pinusilan nga maoy hinungdan nga gihatod kini sa Lapulapu City District Hospital.

Ang biktima miingon nga naglakaw lamang siya sa maong dapit dihang nabatyagan niyang misakit ang iyang bukton ug nagkadugo. (BANAT NEWS)