CEBU, Philippines - 2Higpitan na usab sa kagamhanan sa dakbayan sa Mandaue ang pagdili sa mga minor de edad sa pagsulod sa mga internet cafès sa mga oras nga tingklase.
Nanawagan si Association Barangay Council Federation President ug konsehal Ernie Manatad atol sa ilang gihimong panagtigom sa mga barangay kapitan nga higpitan ang pagpatuman sa ordinansa sa dakbayan nga nagdili sa mga menor nga makasulod sa mga internet cafès diha sa ilang mga barangay karong panahon na sa tingklase.
Sumala pa sa mga barangay officials gihimong ‘gatasan’ niining mga nanag-iya og internet cafès ang kabataan ilabi na ang mga estudyante kinsa maoy permanenteng manulod sa mga internetan.
Samtang ang Department of Education (DepEd) Mandaue City Division mopatuman usab sa pagpugong sa mga tinun-an nga mogawas sa campus panahon sa klase bisan sa ilang recess. Ang pagkaungo karon sa mga bata sa internet maoy gipasanginlan sa DepEd nga hinungdan sa nagkadaghang dropouts sa elementarya ug high school ug sa pagkubos sa ilang academic achievements.
Si James Abadia nga maoy city administrator sa dakbayan mipadayag nga mohimo siya og rekomendasyon ngadto kang Mayor Jonas Cortes sa pagluwat og executive order alang sa higpit nga pagpatuman sa ordinansa. (EIM)(BANAT NEWS)