Mag-uuma gipatay sa tugkaran

CEBU, Philippines - Naligo sa kaugalingong dugo ang usa ka lalaki human kini gipaulanan og bala sa wala mailhing mamumuno pasado alas- 4 sa miaging hapon sa sitio Santa Cruz barangay Sacsac lungsod sa Pinamungajan. Ang biktima nailhan nga si Dionisio Sinajon, 57, molupyo sa maong lugar ug usa ka mag-uuma.

Sa imbestigasyon sa kapolisan sa lungsod sa Pinamungajan, nasayran nga usa ka Laverata Nemenzo ang nakadungog og boto gikan sa panimalay sa biktima.

Hinungdan nga dali usab siyang miadto sa panimalay sa usa ka Neri Generalao, ang misusi sa balay sa biktima ug iyang nakita nga nagbuy-od na kini sa tugkaran.

Daling gidala sa Pinamungajan District Hospital ang biktima apan gideklarar kini nga dead on arrival.

Matud pa ni PO1 Marcelo Inso, sa diha nga nahinabi sa Banat News nga walay bisan usa ang nakamatikod si kinsa ang mamumuno tungod kay layo kaayo ang silingan sa biktima.

Si Generalao nga suod nga higala sa biktima mibutyag sa kapolisan nga nawagtang ang mga binuhing mga manok sa tugkaran sa biktima nga gituohang maoy motibo sa mga kriminal.

Apan nahibulong ang kapolisan tungod kay wala kuhaa sa mga kriminal ang pitaka sa biktima nga naa sa bulsa niini hinungdan nga mas gipalawman pa nila ang imbestigasyon. (BANAT NEWS)