Tulisan Gisuklan

MANILA, Philippines - Ning higayuna napakyas ang mga tulisan sa lain na usab untang biktimahong ahente sa produkto tungod kay armado kini ug nakapusil hinuon sa usa kanila.

Ang insidente nahitabo pasado alas- 6 sa miaging gabii diha sa sitio San Antonio barangay Jubay lungsod sa Lilo-an diin usa ka Jaime Tariao, 40, nga taga barangay Looc syudad sa Danao ug usa ka salesman sa ABS-G Marketing ang misukol sa duha ka mga tulisang nagmotor nga mitulis kaniya.

Ang tulisan gihulagway nga nagsuot og itom nga sweatshirt, taason, niwangon ug nagtaptap sa nawong. Matud pa ni Tariao ngadto sa kapolisan nga posibleng naigo niya ang backrider dihang iyaha kining gipusil atol sa ilang pag-ikyas.

Sa imbestigasyon sa kapolisan, ang biktima midangop sa ilang buhatan ug misaysay nga naglingkod siya duol sa usa ka tindahan nga iyang gihatdan og softdrinks dihang naabot ang mga tulisan.

Samtang naghimo siya sa mga resibo kalit miduol ang duha ka tulisan sakay sa usa ka motorsiklo ug ang usa backrider mikanaog ug kalit mition og armas dayong deklarar og tulis.

Aron di pasipad-an wala nalang mireklamo si Tariao dihang gikuot sa tulisan ang iyang mga bulsa ug gikuha ang kinolekta niyang P4 mil ug cellphone.

Human niini daling misakay og balik ang tulisan sa motorsiklong gidala sa iyang kauban apan ang biktima nga duna diay armas nakahigayon sa pagbunot niini gikan sa iyang hawak ug gipusil ang backrider.

Dako ang pagtuo ni Tariao nga naigo niini ang usa sa duha ka mitulis kaniya.

Si PO2 Rotchel Jugalbot nagkanayon nga human sa pagsumbong sa biktima dali silang mihimo og manhunt operation diha sa maong dapit apan wala na nila sila maabti.

Gi-monitor karon sa kapolisan ang tanang mga tambalanan sa matag lungsod ug siyudad sa pamasin nga dad-on sa kauban ang gituohang nasamdang kauban.

Samtang gisusi pa sa kapolisan kung lisensyado ba ang armas ni Tariao. (EIM)(BANAT NEWS)