CEBU, Philippines - Ang Talisay City Police Station dunay 40 ka mga hinashasang sakop sa Talisay City Intelligence Bureau (TCIB) o Barangay Intelligence Network (BIN).
Si Chief Inspector Eddie Recamara nga nahinabi sa Banat News kagahapon nagkanayon nga sukad nga dunay sakop sa TCIB kaniadto nga nalambigit sa krimen gihashasan na gyud nila karon ang mga mopasakop sa TCIB ug ilang ipaubos sa background investigation sa gipuy-an niining barangay.
Si Recamara nagkanayon nga bisan og gamay lang ang mga sakop sa TCIB ang importane nga dili sila badlongon ug kinasing-kasing ang pagtabang niini sa komunidad.
Ang mga TCIB gilangkuban sa mga tanod, pribadong indibidwal ug mga drayber.
Giklaro ni Recamara nga ang serbisyo sa TCIB boluntaryo apan mihangyo siya sa kagamhanan sa Talisay nga hatagan og gasolina ang mga motorsiklo niini. Karon napulo ka mga TCIB matag gabii ang mokuyog-kuyog sa mga polis nga mopahigayon og operasyon sama sa check-point ug night watch.
Ang night watch cop mga polis nga gidestino sa pagbantay sa mga kawatan gisuperbisahan ni Inspector Ricardo Echavez .
Gibutyag ni Recamara nga ang maong grupo gipaubos na ni Inspector Hugo Rio Ipong sa seminar bahin sa pamaagi sa citizen’s arrest, pagpahigayon og patrolya uban sa mga polis ug ang personal safety sa mga miyembro kung mopauli na sila sa ilang tagsa-tagsa ka mga balay. Si Recamara nagkanayon nga sa dili pa mokuyog sa mga polis nga mag-roving, ang mga TCIB ipaubos una niya sa briefing aron dili sila makalimot sa ilang mga angayang buhaton. - (BANAT NEWS)