Suyopanan gironda

CEBU, Philippines - Nabulabog kagahapon sa buntag ang mga nag-pot session sa sitio Magay barangay, Tanke dakbayan sa Talisay atol sa gipahigayong saturation drive sa kapolisan sa siyudad ug miresulta sa pagkasikop sa 11 ka manuyopay ug nag-operate og drug den.

Ang mga nasikop mao si Camelo Abapo, 56, giingong tag-iya sa usa ka suyopanan sa maong lugar, anak niyang si Ronnel Abapo, 23, Jolito Ibanalo, 21 ug Jessie Apolonio, 21, pulos mga drayber og habal-habal ug parehong taga barangay Sin-sin, dakbayan sa Sugbo.

Lakip sa nadakpan mao sila si Marvin Abella, 25, taga barangay Lipata, lungsod sa Minglanilla, Rennie Lapuz, 29, taga barangay Cansojong, Talisay, Darwin Mangaron, 38, taga sitio Rattan, Tanke, Jason Secretaria, 28, taga sitio Manduang, barangay Pakigne, Minglanilla, Anecita Guisihan, 37, taga sitio Magay nga giingong tag-iya usab sa laing balay- suyopanan ug ang 35-anyos nga babaye (kansang pangalan gipugngan) uban sa iyang 16-anyos nga anak.

Si Camelo (Abapo) nga nahinabi sa Banat News kagahapon nagkanayon nga wala siya’y laing kapaingnan hinungdan nga nagbutang siya og suyopanan sa iyang balay nga maoy iyang gihimong panginabuhian pinaagi sa kitaong P50 ngadto sa P100 matag adlaw.

Apan ang tulo ka mga babayeng lakip sa nadakpan mihimakak nga duna silay kalambigitan sa ginadiling drugas ug igo ra silang nanan-aw og tv ug ang menor de edad natulog apan giapil sila pagdakop.

Pag-abot sa mga polis ang manag-inahan diha gyud sa balay ni Guisihan ug nanagan sa ibabaw nga bahin sa balay sa ilang pag-abot.

Apan nagduda ang mga polis tungod nasugatan nila pag-abli sa pultahan ang aso sa ginadiling drugas nga gisigihan og hingos sa mga suspetsado.

Na-recover sa mga polis gikan sa balay ni Camelo ug Guisihan ang walo ka lampara, duha ka posporo, ug daghang mga tin foils nga gamiton pagsuyop sa mga suyopanan.

Si Chief Inspector Eddie Recamara, officer-in-charge sa Talisay City Police Station nagkanayon nga naay lugar diha sa Tanke kaniadto pang gidungog nga daghang drug dens ug naghitak ang ginadiling drugas.

Matud niya nga kung ang usa ka tawo magumon na sa bisyo sa ginadiling drugas daku ang posibilidad nga mobuhat kini og krimen sama sa pagpangawat og pagpanulis.

Si Kapitan Perlas Cabanes nga nahinabi sa Banat News nagkanayon nga ang sitio Magay maoy labing gidungog diha sa ilang barangay nga naghitak sa ginadiling drugas.

Apan matud niya nga walay mamaligya diha sa ilang lugar kundili mogamitay lang base sa iyang nahipos nga report.

Si Cabanes mihangyo nga pabutangan ang ilang lugar og mga polis nga mag-checkpoint aron masita ang mga mosulod ug mogawas sa ilang dapit.   (EIM) - (BANAT NEWS)