Quarry sa Argao ipasuspenso

CEBU, Philippines - Adunay nakit-ang kalapasan sa gikuhang permit sa pag-quarry ang Department of Environment and Natural Resources nga nakaingon sa pagkahugmak niini ug diriyot makapatay sa duha ka nagmina sa ilawom niadtong milabay’ng Huwebes sa buntag sa barangay Kalagasan sa lungsod sa Argao.

Ang Public Information Officer sa DENR nga si Eddie Llamedo nga nahinabi sa Banat News kagahapon nagkanayon nga ang ilang regional director nga si Loreto Alburo mipadala dayon sa ilang mga mining engineer nga sila si Edgar Lagarnia ug Romeo Patalinghug aron mopahigayon og imbestigasyon.

Si Llamedo mibutyag nga niadtong Enero 17, 2011 ang kagamhanan sa probinsiya miisyu og quarry permit alang sa pagpanguha og limestone ngadto sa tag-iya sa yuta nga si Rogelio Fuentes ug mapupos kini karong Enero 16, 2012.

Kahinumduman nga sila si Fredelito “Nitoy” Alforque ug Nelson Pentojan parehong residente sa maong dapit kinsa nangubkob aron manguha og mga bato alang sa stone craft ang natabunan diha sa ilawom sa ilang kinubkuban human midahili ang yuta sa ibabaw’ng bahin.

Milanat ngadto sa 14 ka oras una makuha ang duha gikan sa lungag sa mga rescuers. Si Alforque ug Pentojan kinsa nakaangkon lang og gagmay’ng garas sa lawas nakagawas sa lungag pasado alas 11:00 sa gabii sa samang adlaw.

Si Fuentes gitugotan sa DENR nga mag-quarry sa 1.16 ektaryang luna niini. Apan adunay nakitang kalapasan ang DENR sa operasyon sa maong quarry tungod kay adunay bangag nga gihimo sa quarry site.

Iyang gipasabot nga ang quarry walay entrada o lungag nga gitugot tungod kay gidili sa quarrying ang paghimo og tunnel. Kini maoy hinungdan nga ipahunong nila ang operasyon sa maong quarry ug suspensohon ang permit hangtud nga ang tag-iya sa luna makatuman sa mga rekisitos nga girekomendar sa DENR usa na niini mao ang safety requirements.

Ang lugar usab butangan og signage nga dili una kini paduolan tungod kay delikado sa laing pagdahili sa yuta. Gituohan nga tungod sa sunod-sunod nga uwan maoy nakaingon sa pagdahili niini.

Si Mayor Edsel Galeos sa lungsod sa Argao sa pakighinabi sa Banat News mibutyag nga mopahigayon siya og imbestigasyon kabahin sa nahitabo. (BANAT NEWS)