Tungod sa balatian, asawa naghikog

CEBU, Philippines - Usa ka ginang nga pipila ka tuig nang nag-antos sa sakit nga high blood ug diabetes ang naghikog didto sa pinuy-anan niini sa sitio Guindarohan Proper, lungsod sa Minglanilla sa miaging Huwebes sa buntag.

Ang nagpakamatay mao si Daisy Delicana, 41, minyo ug nagpuyo sa nahisgutang lugar.

Si PO2 Raymund Hortezuela sa Minglanilla Police mibutyag sa Banat News nga ang bana niini maoy nakadiskobri sa patay’ng lawas   sa iyang asawa.

Si Feliciano Delicana mitug-an sa kapolisan nga nakurat siya dihang pag-abot niya sa ilang balay maoy nakita niya nga nagbitay na sa pisi si Daisy kansang liog gihiktan og bakus nga panit nga ang pikas tomoy gigaid sa ilang kisame.

Ang mga kabanay niini mitug-an sa kapolisan nga si Daisy tulo na ka tuig nga nag-antos sa sakit nga altapresyon ug diabetes nga maoy gi-problemahan niini.

Sa paghimo ning balita gipaubos na sa autopsy ang patay’ng lawas samtang gipaabot pa sa kapolisan ang resulta pagtino kun wala bay foul play ang kamatayon niini.   (WC)   - (BANAT NEWS)