Duha ka minero natabunan sa minahan

CEBU, Philippines -  Duha ka tawo ang giingong natabunan sa ilawom sa usa ka minahan og bato kagahapon sa buntag diha sa barangay Calagasan sa lungsod sa Argao gibana-banang 20 ka kilometro gikan sa sentro sa maong lungsod.

Ang natabunan mao sila si Nitoy Alforque ug Nelson Pintojan pulos residente sa maong dapit, apan giingong pulos buhi pa atol ning pagsuwat sa balita alas-8 kagabii ug padayong gimano-mano pag-ugkat sa mga rescuers pinangulohan ni Bise Mayor Stanley Caminero.

Base sa nakuhang impormasyon sa Banat News diha sa site, adunay kauban ang duha nga si Joey Langi kinsa maoy gisugo sa duha pagsusi sa ibabaw nga bahin tungod sa nagpanagak nga bato.

Apan pag-abot ni Langi nahugno og kalit ang yuta ug natabunan ang duha gibana-banang napulo ka metros sa sulod sa bangag.

Giingong manguha unta og bato aron ibaligya sa mga stone crafts ang tulo diha sa yuta nga gipanag-iya sa usa ka Rogelio Fuentes.

Gisuwayan unta pagkabkab sa backhoe ang yuta apan ang duha mireklamong nangatagak ang yuta diha sa ilawom maong gimano-mano nalang kini og pala sa mga polis ug mga tawo.

Nag-apas ang mga rescuers nga makuha ang duha una pa hingpit nga mahugno ang maong lungag o ba kaha mahutdan og hangin ang duha diha sa ilawom. (BANAT NEWS)