Way relocation site ang dakbayan - Bimbo

CEBU, Philippines -  Mialma si kanhi Cebu City administrator Bimbo Fernandez sa Pagtambayayong Foundation sa mensahe ni City consultant Atty. Jade Ponce nga nangutana kaniyang wala ba kini masayod nga duna’y relocation site ang siyudad kaniadto alang sa mga maapektohan sa nagkadaiyang demolisyon.

Sumala pa ni Fernandez nga isip administrador kaniadto sa siyudad, nasayod siya nga wala gyu’y relocation site alang niini.

“It is precisely because I was a City Hall Executive for so many years that I know that the City does not have adequate relocation sites for the demolished and soon to be demolished homeowners of Mahiga and other creeks,” sumala pa sa opisyal nga statement ni Fernandez nga iyang gipadala ngadto sa mga sakop sa media.

Gipahibalo usab ni Fernandez nga mitanyag na diay siya kaniadto ni Mayor Michael Rama nga mahimong consultant apan gibalibaran siya sa mayor. Sa laing bahin di tugutan ni Rama ang hangyo sa gatosang apektado sa demolisyon nga motukod og balik sa ilang balay sa Mahiga apan gipasaligan silang aduna silay maayong kabalhinan. (BANAT NEWS)