Magtiayong nag-cyber tiklo

CEBU, Philippines - Gironda sa mga ahente sa National Bureau of Investigation (NBI) ang usa ka cyber sex den ug nasikop ang magtiayon kansang asawa nagsabak og unom ka buwan ug giluwas sa mga otoridad ang unom nila ka mga anak nga pulos pa mga menor de edad didto sa lungsod sa Cordova kagahapon pasado alas-7:00 sa buntag.

Ang magtiayon kansang mga ngalan gipugngan nagpangidaron og 44 ang bana, samtang 33 anyos usab ang asawa.

Ang unom nila ka mga anak, tulo niini lalaki ug tulo usab ang babaye kansang kamagulangang lalaki nag-edad og 15, gi-turn over sa NBI ngadto sa buhatan sa Department of Social Welfare and Development (DSWD) 7.

Ang mga ahente sa NBI nga mironda gipangulohan ni NBI Agent Jedidah Hife nga nagdala og Search Warrant nga giluwat ni Judge Meinrado Paredes sa Regional Trial Court Branch 13.

Si Hife nga nahinabi sa mga tigbalita mibutyag nga ang complainant sa maong kaso mao ang Provincial Women’s Commission (PWC) ni Bise Gobernador Agnes Magpale.

Matud ni Hife ang PWC nakadawat og reklamo bahin sa negosyo sa magtiayon nga cyber sex diin ang ila rang mga anak maoy pahubuon atubangan sa camera sanglit ang ilang mga customer pulos mga langyaw.

Ang bayad sa langyaw giingong ipadala ra ngadto sa nahisgutang magtiayon.

Gani ang PWC nakakuha og video footage sa mga batang naghubo atubangan sa camera ug usa sa unom ka anak sa magtiayon gisugo sa customer nga langyaw nga padulaan ang iro samtang nag-atubang sa camera.

Gawas pa niini halos tanang sulod sa video camera pulos gyud law-ay tan-awon.

Tungod niini daling mihimo og surveillance ang NBI kabahin sa maong negosyo sa magtiayon.

Matud ni Hife duha ka semana nilang gipanid-an ang panimalay sa magtiayon didto sa Cordova ug sa dihang nation nilang positibo ang tanan gi-aplayan nila og search warrant ug gironda dayon nila kagahapon ang balay sa magtiayon.

Si Hife mitug-an nga sa dihang nakasulod na sila sa kuwarto sa balay sa magtiayon naaktuhan gayud nila nga naghubo ang unom ka mga bata.

Sa wala pa ihatod ngadto sa DSWD ang unom ka mga bata, ang tulo niini gidala sa Pink Room sa Vicente Sotto Memorial Medical Center (VSMMC) .

Si Bise Gobernador Magpale sa press conference kagahapon miingon nga ilang seguradohong mawagtang ang trauma nga nahiagoman sa mga bata samtang atua kini sa buhatan sa DSWD.

Gipasalig usab sa bise gobernador nga ilang tabangan ang unom ka mga bata ug pa-eskuylahon sa elementarya ug segundarya.

Gipasalamatan ni Magpale ang NBI sa kalampusan niini nga gihatagan dayon og igong pagtagad ang iyang reklamo nga miresulta sa pagkasikop sa magtiayon.

Tungod niini nanghinaot si Magpale nga maundang na ang cyber sex ug pornography dinhi sa Sugbo.

Malaumon ang bise gobernador nga makonbikto ang magtiayon sanglit subay sa iyang nahipos nga impormasyon mokabat na sa tulo ka tuig ang ilang operasyon sa cyber sex sulod sa ilang balay.

Matud ni Magpale nga iyang nahinabi ang asawa ug nagkanayon nga ila kining nahimo ngadto sa ilang mga anak gumikan sa ilang kapobre sa pagpuyo ug wala na sila’y nakitang paagi aron sila mabuhi uban sa ilang mga anak.

Karong buntag posibling isang-at na sa NBI ang kasong Human Trafficking nga kalapasan sa Republic Act 9208 batok sa magtiayon. (WC)(BANAT NEWS)