Kampanya vs rabies hingusgan sa Mandaue

CEBU, Philippines -  Gitinguha sa buhatan sa city veterinarian nga makabansay og mga coordinators sa mga barangay nga maoy magsilbing sinaligan sa mga kalihukan ilabi na sa kampanya sa anti-rabies program sa dakbayan sa Mandaue.

Ang duha ka adlaw nga gipahigayong seminar nga gisugdan kagahapon gihimo sa Social Development Center sa barangay Centro ug maoy mga nahimong resource speaker ang mga personnel sa World Society for the Protection of Animals sa City Health Office sa Mandaue nga naghisgot labot sa mga kaso nga mapaakan sa iro ug uban pa.

Si Daisy Pemetrante nga maoy city veterinarian miingon nga pinaagi sa coordinators matabangan sila sa ilang mass vaccination sa mga iro sa kabarangayan sa dakbayan.

Dugang pa niya nga tumong niini mao nga sa tuig 2013 hingpit na nga mapapas ang rabies ug himuon usab nga gikinahanglang iparehistro ang iro sa kantidad nga P100 ug libre na ang pagbakuna niini.

Gitataw niya nga ubos sa balaod nga makamulta og P500 ngadto sa P1,000 ang tag-iya sa iro nga wala marehistro. (BANAT NEWS)