Mibalibad sa inom giluba og buak nga botelya

CEBU, Philippines -  Nalandig sa tambalanan ang usa ka 22-anyos nga lalaki human kini gidunggab og buak nga botelya sa iyang ig-agaw samtang sila nag-inom sa alas-3 sa hapon sa milabay’ng adlaw diha sa sitio Little Dalaguete sa barangay San Nicolas siyudad sa Sugbu.

Si Danieb Dukay, 22, taga sitio Black Cats sa barangay Duljo-Fatima nakaangkon og samad dinunggaban sa walang bahin sa iyang lawas samtang ang suspetsado mao ra sab iyang ig-agaw nga si Raul Carteciano, 28.

Subay sa pakisusi nila ni PO3 Victor Ruel Ayuman, PO3 Geoffrey Gutual, PO2 Julius Regis ug PO2 Cristobal Geronimo sa Homicide Section sa CCPO nagbutyag nga nag-inom ang biktima ug suspek.

Ang biktima mihangyong dili na siya moinom apan nasuko ang igsuon sa suspek nga si Leo Carteciano hangtud nga sila nagkalalis ug misampot sa ilang pagsinukmagay.

Ang suspek pagkakita nga nalupig iyang igsuon mikuha kini sa botelya sa beer ug gihapak ngadto sa ulo sa biktima apan wala makaigo ug ang basiyo didto mapunta sa bongbong hinungdan nga nabuak kini.

Human niini gipunit sa suspek ang nabuak nga botelya ug gidunggab niini ang biktima.

Ang Mobile Patrol Group midakop sa suspek samtang gidala sa Cebu City Medical Center (CCMC) ni Cerila Carteciano inahan sa suspetsado ang biktima.(EIM) (BANAT NEWS)