Tanod nga 'mipatay' sa asset gidakop

CEBU, Philippines - Usa ka tanod nga gilambigit sa pagpatay sa usa ka kanhi police asset ang gidakop kagahapon sa buntag sulod sa ilang pinuy-anan diha sa sitio Sakaan sa barangay Tabunok sa lungsod sa Sogod.

Ang nadakpan mao si Dario Pepito, 48, gilambigit nga suspek sa pagpatay sa ilang silingan nga asset nga si Felipe Impas niadtong Oktobre 1, 2010 tungod sa ilang personal nga panagbangi.

Gibasihan sa kapulisan sa pagsikop ni Pepito ang Warrant of Arrest nga giisyu niadtong Mayo 23 ni Judge Silva Paderanga sa Regional Trial Court Branch 25 sa dakbayan sa Danao.

Si PO2 Dario Dinopol ang warrant server sa Sogod Police Station nagkanayon nga human nila madawat ang WOA alas-9 kagahapon sa buntag ila dayung giadto ang balay ni Pepito kinsa wala mopakita’g pagsukol sa kapulisan.

Matud ni Dinopol human sa hitabo niadtong Oktobre wala gyud molayas si Pepito sa ilang lugar.

Si Pepito maoy gitumbok nga mipusil patay kang Impas apan boluntaryong mitahan sa kapulisan human sa hitabo apan hugtanong mihimakak nga siya maoy nagpusil sa biktima ug gani niadtong hitaboa midasig pa sa kapulisan nga andam siyang mopailawom og paraffin test.

Gibuhian siya sa kapulisan human ang pamilya ni Impas napakyas sa pagsang-at og kaso batok kaniya.

“Unya ra kuno sila mo-file inig human sa lubong unya reglamantory period naman kinahanglan namo buhian,” matud pang Dinopol kabahin sa nahitabo kaniadto.

Si Pepito kasamtangan karung gitanggong sa detention cell didto sa Sogod Police Station. (BANAT NEWS)