Ex-convict nga nanghasi gibirahan patay

CEBU, Philippines - Patay ang usa ka ex-convict nga giingong nanghingi apan nag-wild human wala hatagi sa mga tawo atol sa pista apan gipusil patay sa duha ka wala mailhing tawo nga luwan og motorsiklo niadtong Domingo sa hapon diha sa barangay Zaragosa sa lungsod sa Aloguinsan.

Ang biktima giila sa kapulisan nga mao si Ambrosio Banusa gibana-banang nagpangidaron 50 anyos taga barangay Kandingan bukirang lugar sa nahisgutang lungsod ug usa ka ex-convict gikan sa Muntinlupa tungod sa kasong robbery sa dakbayan sa Sugbu ug sa probinsya. Sigun sa pasiunang imbestigasyon sa kapulisan bisperas sa tinuig nga kapistahan sa naasoy’ng lugar niadtong Domingo ug dunay tigbakay.

Ang biktima gikatahong hubog ug nangolekta og kwarta gikan sa gawas sa tigbakayan ug sa mga tindahan apan wala hatagi sa nag-inom hinungdan nga nag-wild pinaagi sa pagwara-wara sa iyang .45 nga kalibre sa armas.

Matud sa kapulisan nagpasalba kaduha ka higayon ang biktima hinungdan nga nagkatibulaag og panagan ang mga tawo apan dihay kalit mitunga nga motorsiklo nga gisakyan og duha ka tawo dala sa drayber ug ang angkas maoy mipusil sa biktima makadaghang higayon.

Ang mga kriminal daling mipasirit sa ilang motorsiklo paingon ngadto sa siyudad sa Carcar samtang ang biktima patay dihadiha dayun.

Narekober sa kapulisan ang .45 nga kalibre sa armas nga puno sa bala ang magazine ug lima ka empty shells sa kalibre .45 nga pistola.

Matud sa kapulisan nga posibleng giinitan ang biktima sa mga tawo tungod sa batasan ug gipakitang taras niini ngadto sa mga tawo. (EIM) (BANAT NEWS)