Nakatulog sa kahubog gipusil

CEBU, Philippines - Kritikal ang kahimtang sa usa ka estambay human kini gipusil samtang natulog tungod sa kahubog sa usa ka cottage didto sa sitio Looc, Poblacion lungsod sa Argao kagahapon sa alas 5:15 sa buntag.

Ang biktima mao si Simeon Rondez, 39, samtang wala pa matumbok sa kapulisan kung kinsa ang responsable.

Ang biktima gikan namista sa maong lugar ug nakatulog diha sa Mahayahay Beach dihang giingong gidul-itan sa pagpusil gamit ang wala matinong kalibre sa armas sentro sa tiyan niini.

Ang mga estambay sa lugar nga nakamatikod sa buto sa armas mao nay nitabang sa biktima ug mihatud kaniya sa Isidro Kintanar Memorial Hospital. Gituohan sa kapulisan nga paregla ang motibo sa kremin. - (BANAT NEWS)