Random testing sa school supplies gisugyot

CEBU, Philippines - Naglaraw ang konseho sa dakbayan sa Sugbo uban sa pag-abag sa Department of Trade and Industry (DTI) ug Department of Education nga moumol og random testing alang sa mga basic school supplies aron magiyahan ang mga tinun-an ug magtutudlo sa pagpalit nila og mga butang sa eskwelahan nga environment-friendly.

Sa gipasar nga resolusyon sa konseho nga dunay uban nga mga butang sama sa notebooks, bags, pencil cases, sapatos, libro ug sinina nga dunay sagol nga polyvinyl chloride (PVC).

Ang maong kemikal giila isip poison plastic ug makadaot kini sa panglawas sa tawo ug peligro kaayo kini sa mga bata ilabi na kadtong hinay ang immune system.

Giawhag usab sa konseho sa siyudad ngadto sa DTI sa pagsusi sa mga nagsakang presyo sa mga school supplies ilabi na nga nagkaduol ang adlaw sa tingklase.

Ang maong resolusyon giumol sa konseho human nakadawat sila og report nga pipila sa mga negosyante ang nagsugod na og paburot sa presyo sa gipangbaligya nila nga mga school supplies.

Nasayran nga ang wala motuman sa suggested retail price, makadawat og silot nga base sa Consumer Act of the Philippines. (BANAT NEWS)