Rewiring program gilusad sa Aboitiz

CEBU, Philippines - Ang Aboitiz Foundation nagpasiugda og rewiring program sa mga publikong tulunghaan sa dakbayan sa Mandaue nga ilang makitang kuyaw sa sunog tungod sa dili tukmang gidak-on sa mga kuryenteng gigamit niini.

Ang maong kalihokan gisuportahan usab sa kagamhanan sa maong dakbayan sa pagpangilis sa mga linya sa kuryente   nga gipanaod sa mga publikong tulunghaan sa high school ug elementarya sa   nagkalainlaing barangay sa maong dakbayan.

Si Ricardo Lacson Jr., bise presidente sa Aboitiz Foundation for administration nga mao usab ang hepe sa Customer Service-Group sa Visayan Electric Company (VECO) nagkanayon nga kining maong serbisyo maoy kabahin sa ilang pangalagad isip abag sa kagamhanan sa Mandaue.

Atol sa turnover ceremony sa P1.2 milyones nga school building nga may tulo ka mga lawak saringan sa Leonard Wood Elementary School sa Eversely Child Sanitarium compound sa barangay Jagobiao sa maong dakbayan, si Lacson miingon nga gihatagan og dakong pagtagad sa Aboitiz Foundation ang edukasyon   sa mga kabataan karon.

Gipasabot ni Lacson nga mawad-an og kapuslanan ang ilang programa kun ang mga instalasyon sa kuryente niini di magkadimao. (BANAT NEWS)