CEBU, Philippines - Si Gobernador Gwendolyn Garcia mibutyag nga may prisyo nang nasabutan ang Kapitolyo ug si Kalihim Jessie Robredo sa Department of Interior and Local Government (DILG) bahin sa lote nga nahisakop sa isyu sa provincial ordinance 93-1.
Apan giklaro niya nga sa pagkakaron dili pa siya makabutyag niini aron dili malawgaw ang nagpadayong negosasyon kalabot sa maong mga luna.
Hinuon gipasalig sa gobernador nga sama sa naandan, sa kanunay iyang gisiguro nga ang nasabotan makiangayon alang sa lalawigan ug sa katawhan nga nagpuyo sa maong yuta.
Miingon si Garcia nga gipaabot lang niya ang tukmang higayon una niya ibutyag ang maong prisyo ngadto sa publiko ug ilabi na sa mga hingtungdang molupyo.
Kahinumdoman nga nagkasabot niining tuiga ang kagamhanan sa lalawigan sa Sugbo ug si Robredo, kinsa maoy nagsilbing taytayan sa negosasyon sa 93-1 human sa pagbinayluay og baruganan kalabot sa maong problema.
Samtang gipaniguro sa gobernador nga ang isyu bahin sa 93-1 masulbad sa dili pa matapos ang iyang termino. (BANAT NEWS)