Gipanigbas, patay

CEBU, Philippines -    Patay ang usa ka tawo nga gitigbas sa kaubang trabahante sa usa ka stone craft factory sa sitio Kasambaran sa barangay Dapitan sa lungsod sa Cordova alas-2 pasado ang takna sa miaging Domingo sa kaadlawon.

Ang namatay nga igo lang nailhan sa pangalang ‘Arthur’ nga giingong lumad nga taga dakbayan sa Talisay trabahante ni Manuel Nuñez nga stone craft factory.

Si PO1 Ryan Casiban sa kapolisan sa maong lungsod miingon nga si Nuñez nga maoy nagtaho sa ilang buhatan sa maong hitabo dili usab makahatag sa tukmang bansagon sa biktima sanglit wala man diha iyang piniyalan sa trabaho sanglit mipauli man kini sa ilang lungsod human sa sweldo sa miaging Sabado sa hapon.

Dugang pa ni Casiban nga nailhan hinuon ang suspetsado nga si Alejandro Urot alyas Alex nga stay-in worker sa biktima.

Matud pa ni Casiban nga subay sa gihimo nilang imbestigasyon ni SPO1 Llovero Agusto ug PO3 Rovilo Librado maoy ilang nasuta nga nag-inom ang duha sanglit bag-o man sila nagsuweldo.

Apan kalit lamang mitumaw ang panaglalis ug ang suspetsado nga wala makapugong sa kasuko daling mikuha’g sundang dayong tigbas sa kalawasan sa biktima sa makadaghang higayon.

Human sa maong pagtigbas ang suspetsado dali usab nga mipahilayo sa maong dapit ug wala na kini maabti sa mga polis nga mitubag sa maong alarma.

Si Casiban miingon nga si Dr. Christopher Calimbras nga maoy municipal health officer sa maong lungsod mideklarar sa biktima nga patay na. (EIM) (BANAT NEWS)