CEBU, Philippines - Posibleng makagawas karung adlawa ang policewoman nga nakapusil patay sa iyang bana human gikatahong ang pamilya sa lalaki posibleng dili na mopasaka og kaso batok kaniya.
Ang hepe sa Cordova Police Station Senior Inspector Noli Sernio, mibutyag kini sa diha nga nahinabi sa Banat News nga niadtong adlaw’ng Sabado iyang gika-estorya ang pamilya sa bana ni PO1 Chona Amoren.
Matud pa ni Sernio nga iyang giingnan ang pamilya sa namatay nga si Elmer Amoren nga kun dili sila mo-execute og affidavit makagawas si PO1 Amoren sulod sa 36 ka oras gikan sa iyang pagkapriso.
Apan matud pa ni Sernio nga ang pamilya sa bana ni Amoren mibutyag nga dili sila moluwat og affidavit batok sa policewoman kini tungod kay ang bata ang ilang gihuna-huna ug naluoy usab kini sa policewoman.
Samtang mibutyag usab si Sernio nga base sa iyang assessment ni PO1 Amoren nga aksidente lang gyud ang nahitabo base usab sa gibutyag ni Amoren ngadto kaniya.
Samtang si Lapu-lapu City Police Office Director Anthony Obenza mibutyag usab nga ila pa usab nga sutaon kun unsay mga liabilities ni Amoren usa pa sila mosang-at og administrative nga kaso.
Matud pa ni Obenza nga anaa pa sila karun sa first phase sa ilang imbestigasyon nga gipanguluhan ni Supt. Virgil Ranes.
“Base on her explanation accidental ra jud to pero ipa-investigate gihapon nato,” pasabot pa ni Obenza.
Kahinumduman nga nianang Biyernes sa gabii kalit nga nahigmata si PO1 Amoren dihang gitawag siya sa iyang bana nga hubog apan sa iyang pagduol gikatahong gilabay siya niini og sinina ug cellphone.
Giingong gitukmod sa biktima ang suspek ug gikuha ang service firearm sa maong polis diha sa drawer hinungdan sa ilang panag-ilogay ug aksidenteng mibuto ang pusil ug naigo sa tiyan biktima.
Si Amoren maoy midala sa bana sa Mactan Doctors Hospital apan Domingo alas 9:30 nakabsan kini sa kinabuhi. (BANAT NEWS)