Nagkawil nalang ang ulo

CEBU, Philippines - Nagkawil-kawil nalang ang ulo sa usa ka lalaki nga gitigbas sa liog sa iyang silingan atol sa ilang panag-away diha sa sitio Dagooc, barangay Cabangahan, lungsod sa Consolacion alas-11 pasado ang takna sa miaging Sabado sa gabii nga maoy nakaingon sa hinanali niining kamatayon.

PISTA NABULABOG SA SUNOG

Naputol ang kasadya sa pista sa San Isidro Labrador sa sitio Bugnay, barangay Labangon, dakbayan sa Sugbo dihang usa ka sunog ang milamoy sa 26 ka panimalay sa ilang lugar samtang nagsaulog sila sa kapistahan kagahapon sa hapon.

Si Supt. Anderson Comar dihang gikahinabi sa Banat News nagkanayon nga mikabat sa P260 mil ang danyos. Base sa pasiunang imbestigasyon nagsugod ang sunog sa ikaduhang andana sa balay ni Susan Caballero.

Matud pa nga mibuto nga electric fan ang hinungdan base usab sa gitug-an ni Caballero kang Comar. Ang anak ni Caballero nga si Jimboy, 23, nga natulog sa ikaduhang andana gikatahong naangol human maigo sa mibutong electric fan.

Naangol usab ang amahan ni Caballero nga si Pregrinos, 52, nga napaso apan dili grabe.

Base sa report sa DYAB nga duha ka mga hamtong nga lalaki ang nangaangol, usa kanila gibana-banang 50-anyos kinsa nakaangkon og mga paso sa kalawasan samtang ang usa giingong nataupan og tari sa manok ug parehong gidala sa mga sakop sa Basak Pardo Emergency Team ngadto sa Cebu City Medical Center (CCMC).

Si Comar midugang nga naglisod sila sa pagresponde tungod sa kapiot sa agianan ug naa sa sulod ang sentro sa sunog ug ingon man ang kadaghan sa mga ususerong walay labot nga nagpaso-paso sa ilang agianan.

“Tanang pamaagi among gibuhat sama sa hose-relay ug engine-relay,” matud pa ni Comar aron lang maabot ang kalayo.

Si Kapitan Victor Buendia nagkanayon nga gipalimpiyohan na niya ang karaan nilang barangay hall alang sa temporaryong kapasilungan sa mga nabiktima sa sunog. (BANAT NEWS)