Tig-towing sa Mandaue ilisan

CEBU, Philippines -  Giplanohan sa kagamhanan sa dakbayan sa Mandaue nga ilisan ang towing company nga nagserbisyo karon sa maong dakbayan gumikan sa daghang reklamo kalabot sa pagpatuyang niini og pamira ug pagpangguyod og sakyanan.

Matud pa ni Mayor Jonas Cortes nga ilisan nila ang Jadewell Towing Services gumikan sa way bugto nga reklamo sa mga motorista.

Ang mayor mismo ang mihangyo sa konseho sa dakbayan nga kinahanglang mangita og laing kompaniya nga iilis sa Jadewell.

Matud pa ni Cortes ang maong lakang ila nang giduso ngadto sa ilang legal division aron matun-an kini sa ilang City Attorney.

Samtang si Tomas Villanueva ang Operation Manager sa Jadewell wala motuo nga ilisan sila sa mayor.

Iyang gipanghimakak   ang pasangil nga magpataka lang sila og pangguyod og mga sakyanan nga iparking sa daplin sa karsada.

Apan nangita na karon ang konseho og kompaniya nga ihulip sa Jadewell gumikan sa pagka-way ayo sa maong kompaniya. (BANAT NEWS)