CEBU, Philippines - Kritikal ang kahimtang sa usa ka asawa nga gidunggab sa iyang bana sa sitio Tiangi sa barangay Babag I, dakbayan sa Lapulapu kagahapon sa alas 6:00 pasado sa buntag.
Ang biktima mao si Alma Pepito, 34, samtang ang suspetsado niyang bana mao si Juanito Pepito, 60, ug pulos nagpuyo sa maong dapit.
Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga buntag nang nauli sa ilang balay ang biktima gikan sa iyang trabaho sa Mactan Export Processing Zone (MEPZ) ug nagkalalis kini ug ang suspek.
Ang suspetsado kinsa mibati og hilabihang kasuko mikuha og kutsilyo sa ilang kusina ug gihansak sa walang dughan sa biktima.
Si Melvin Tumulak, hingkod, nga silingan sa magtiayon nakadungog sa pagpangayo og tabang sa biktima maoy midali sa pagsagang sa kamot sa suspek sa ikaduha na untang hansak niini aron tiwasan ang biktima.
Dugang pa ni PO2 Jocotan nga dali nga gidala ang biktima sa Vicente Sotto Memorial Medical Center samtang ang suspetsado padayon pang gipangita sa kapolisan human kini mosibat human sa hitabo.(WC) (BANAT NEWS)