CEBU, Philippines - Mikabat ngadto sa 16 ka mga balay ang naapektohan sa nahitabong pagpangligid sa mga bato diha sa barangay Naalad, dakbayan sa Naga kagahapon sa mga alas 10:00 sa buntag.
Apan walay gikatahong mga naangol sa maong hitabo matud ni Mayor Valdemar Chiong kinsa nahinabi sa Banat News kagahapon.
Matud ni Chiong nga sa 16 ka mga balay duha niini ang totally damaged ug duha usab ang partially damaged.
Gibutyag sa mayor nga ang maong lugar duol sa sapa ug gituohan nga tungod sa sigeng uwan dala sa bagyong Chedeng midahili ang mga bato sa ibabaw’ng bahin sa lugar.
Gimando na ni Chiong ang pagpabakwit sa mga residente sa mas luwas nga lugar apan sagad naa lang temporaryong mipuyo sa ilang mga paryente nga wala maapektohi sa samang barangay.
Ang mga sakop sa City Social Welfare sa oras sa pagsuwat niining balita atoa pa sa lugar nagpahigayon og imbestigasyon sa hitabo.
Kahinumduman nga niadtong milabay’ng mga semana ang barangay Bairan sa maong dakbayan midahili ang yuta diin usa ka 65-anyos nga mag-uuma nga si Marcial Lacara ang naangol samtang sobra sa 10 ka pamilya ang naapektohan tungod sa landslide. (BANAT NEWS)