Napatay sa asawang polis

CEBU, Philippines -  Patay ang usa ka bana human kini giingong napusilan sa kaugalingong asawa nga policewoman atol sa ilang panag-away diha sa ilang pinuy-anan sa barangay Alegria lungsod sa Cordova niadtong Biyernes sa alas 11:45 sa gabii.

Ang biktima mao si Elmar Garcia Amoren, 28, molupyo sa nahisgutang lugar samtang ang suspek mao ra usab ang kaugalingon niining asawa nga usa ka policewoman nga si PO1 Chona Pogoy Amoren, 28, nadestino sa operations branch sa Lapulapu City Police Office (LCPO).

Si PO2 Calixto Butantan sa Cordova Police Station dihang gikahinabi sa Banat News sa telepono nagkanayon nga nakabsan sa kinabuhi si Amoren alas 9:30 sa buntag kagahapon samtang giatiman sa tambalanan.

Matud ni SPO1 Laurencio Wagwag sa Cordova Police Station dihang nahinabi sa Banat News subay sa imbestigasyon ang biktima kauban sa ig-agaw nga nag-inom sa ilang panimalay.

Ug dihang nangahubog na nagsige kini og saba-saba ug nagpunay og tawag sa pangalan sa iyang asawang polis nga natulog niadtong higayuna sa ilang kwarto kauban ang ilang anak.

Niabot sa punto nga nakamata ang suspek tungod sa kasaba sa bana nga hubog na niadtong higayuna ug dihang migawas sa kwarto gilabay kini sa biktima og sinina sa nawong.

Matud pa nga wala pa matagbaw ang bana gilabay na usab niya ang asawa sa cellphone nga gikuptan ug naigo sa kamot sa maong polis.

Hangtud nga nahigmata ang ilang 5-anyos nga anak tungod sa kasaba apan hasta kini matud pang Wagwag gitukmod usab sa biktima ug natumba.

Gikatahong gikuha sa biktima ang armas sa suspek diha sa drawer ug nahitabo ang ilang linayogay apan aksidenteng mibuto ang .38 kalibreng armas ug naigo sa tiyan ang bana.

Ang suspek mao ra usab ang mitabang kaniya paghatud ngadto sa Mactan Doctors District Hospital sa dakbayan sa Lapulapu ug sa paghimo ning balita padayon pang giatiman sa mga doktor.

Human niini boluntaryong mitahan ang policewoman ngadto sa kapulisan sa Cordova ug giturn-over niini ang iyang service firearm nga dunay upat ka buhing bala ug usa ka blangko aron ipaubos sa ballistics examination.

Ang suspek nagtingkagol na karun sa karsel samtang nagpaabot sa tukmang sumbong nga iyang atubangon. (Ug nila ni Lesley Caminade ug Romeo Limpangog/EIM) (BANAT NEWS)