CEBU, Philippines - Nasakmit sa kapolisan ang illegal nga drugas nga balor og P50 mil ug kuwartang P100 mil nga gituohang halin sa ginadiling drugas atol sa pagpanghiling sa kapolisan dala ang search warrant sa balay sa gisuspetsahang level 2 nga drug pusher sa barangay Bulacao syudad sa Talisay sa miaging gabii.
Ang balay nga gironda sa mga sakop sa Criminal Investigation and Detection Group (CIDG) nga gipangulohan sa hepe niini nga si Chief Inspector Fermin Armendares mao ang balay ni Caloy Abalo.
Ang kapolisan nga misil-ing sa mga suok sa balay sa suspetsado nakapunit og usa ka dakong pakete sa gituohang ginadiling drugas, duha usab ka medium size sa gituohan gihapon nga ginadiling drugas ug katorse usab ka mga gagmay’ng pakete sa gituohan gihapon nga ginadiling drugas nga gibana-banang nagkantidad og P50 mil ang tanan.
Lakip usab sa nasakmit sa kapolisan mao ang 19 ka mga sihag nga plastic nga gituohang maoy sudlanan o putos sa ginadiling drugas ug ang kwarta nga nagkantidad og P100 mil.
Nasayran nga atol sa pagsaka sa kapolisan sa balay ni Abalo wala na nila hiabti ang suspek kinsa giingong mohalin og dili mominus 25 gramos matag semana nga nagkantidad og P165 mil. (BANAT NEWS)