Lawas gilapsan sa bala

CEBU, Philippines -  Patay ang usa ka tawo kansang lawas   gilapsan sa mga bala gikan sa armas de fuego sa wala hiilhing kriminal didto sa sitio Lupot, barangay Sabang, dakbayan sa Danao sa miaging gabii.

Ang biktima mao si Luciano Dayang Lutchavez, 23, minyo nga taga sitio Mahayahay sa barangay Dumlog, sa maong dakbayan.

Si SPO4 Edgar Gomez sa kapolisan sa maong dakbayan nga nahinabi sa Banat News miingon nga ang biktima mitambong sa bispiras sa tinuig nga pangilin   didto sa Sabang kuyog sa hinigugmang babaye.

Apan samtang nalingaw   ang biktima sa pagtan-aw sa color game kalit lang mitumaw ang wala hiilhing lalaki ug gipusil ang biktima.

Ang biktima unang naigo sa walang bahin sa iyang bukobuko ug milapos sa walang dughan tumong sa kasingkasing, laing igo sa tuong buko-buko ug milapos sa tuong dughan ug laing igo sa hawak nga milapos gihapon sa pus-on sa biktima.

Dihadiha nahapla sa yuta ang biktima ug nabugtoan dayon sa kinabuhi.

Padayon pang gipangita sa kapolisan ang kriminal. (Romeo T. Limpangog/WC)

Jaguar KTV bar hingpit nang gipasirhan

Ni Sanden Anadia

Si Mayor Michael Rama miluwat na og mando sa pagpasira sa Club Jaguar KTV Bar nga nahimutang sa Barangay Kasambagan niining dakbayan sa Sugbo gumikan sa pagpatrabaho og mga menor de edad nga babaye.

Ang mando sa mayor gihimo gumikan sa kalapasang nahimo sa maong balay kalingawan batok sa Republic Act 9208 nga nailhang Trafficking of Person.

Kini   may labot sa insidente niadtong buwan sa Abril niining tuiga diin may 146 ka mga babaye ang nasalbar sa mga sakop sa Regional Anti-Trafficking Force, Inter-Agency Council Against Trafficking ug sa Department of Justice   gikan sa nahisgutang KTV bar.

Mihatag sa kooperasyon sa maong operasyon ang International Justice Mission ug Department of Social Welfare and Development aron sa pagsilbi sa search warrant nga giluwat ni Judge Ramon Daomilas sa Regional Trial Court Branch 11. (Sanden J. Anadia/WC) (BANAT NEWS)