CEBU, Philippines - Mibahad si Sr. Supt. Patrocinio Comendador, hepe sa Cebu Provincial Police Office (CPPO) nga pahamtangan niya og bug-at nga silot ang polis nga hubog ug nakadasmag og babaye sa gimaneho niining police car niadtong Miyerkules sa gabii ug ang hepe niini nga wala dayon mopahibawo kaniya sa hitabo.
Ang gibaharang silotan mao si PO2 Charlie Valmoria sa Cordova Police Station ug ang hepe mismo sa maong buhatan nga si Sr. Insp. Noli Cerneo.
Si Valmoria nagmaneho sa Police patrol car sa lungsod dihang nasaghiran sa kilid sa sakyanan si Berlin Felicidad Buta, 23, dalaga, usa ka katabang sa barangay Dapitan sa lungsod.
Hinuon walay bun-og ug samad ang lawas sa biktima.
Si Valmoria usa kanhi ka sakop sa Bantay Dagat apan gidestino kini siya isip traffic enforcer sa maong lungsod ug atol sa hitabo, day off siya ug matud pa gisakyan ang ilang patrol car nga walay gipananghiran.
Atol sa gihimong ocular inspection ni Sr. Insp. Noli Cerneo, hepe sa kapolisan sa Cordova puwerting pagkagubaa sa ‘T light’ sa tuong bahin sa patrol car nga Toyota Hi-Lux.
Si Comendador nga nahinabi sa mga tigbalita nagkanayon nga iyang gipatawag si Cerneo kay napakyas kini sa pagpahibawo kaniya ug sa pagpa-liquor test kang Valmoria aron mapamatud-an nga kini hubog nga nagmaneho sa patrol car.
Matud pa ni Comendador nga ang kapakyas ni Cerneo sa pagpahibawo sa hitabo sulod sa duha ka takna human sa hitabo maoy usa sa iyang sipyat nga mapahamtangan usab siya og bug-at nga silot. (BANAT NEWS)