Na-stranded tungod ni Chedeng

CEBU, Philippines - Gatusan ka mga pasahero ang natanggong sa pantalan dinhi sa dakbayan sa Sugbo kagahapong adlawa human nakanselar ang mga biyahe sa mga barko paingon sa mga lugar nga gipaubos sa storm signal number one tungod sa bagyong Chedeng.

Gibutyag ni Coast Guard Central and Eastern Visayas Deputy Commander Anelito Gabisan sa Banat News nga sukad kagahapon sa alas 10:00 sa buntag hangtud sa pagka alas-2 sa hapon moabot na og 14 ka mga biyahe ang nakanselar.

Ang wala makabiyahe mao ang mga barkong 1,000 gross tonnage paubos sama sa mga biyahe gikan dinhi sa Sugbo paingon sa Northern Leyte, sama sa Palompon, Bato, Ormoc, Masbate, Burias Island, Biliran, Samar ug uban pang dapit.

Nunot niini gibanabanang moabot ngadto sa 700 ka mga pasahero ang natanggong sa pantalan dinhi sa dakbayan kagahapon.

Hinuon sukad kagahapon walay natala ang Cebu Coast Guard nga mga aksidente sa kadagatan nunot sa pagkusog sa hangin nga nakamugna og pagdagko sa bawod gumikan sa bagyo.

Apan gipasidan-an ni Gabisan ang mga mananagat nga likayan lang una ang pagtabok sa dagat gumikan sa kusog nga hangin ug dagkong bawod.

Ang bagyong Chedeng migawas na sa teritoryo sa Pilipinas apan sa pagbiya niini pipila ka mga dapit sa Central ug Eastern Visayas ang gibahaan lakip na sa Luzon. (BANAT NEWS)