Laing ahente gitulis

CEBU, Philippines -  Moabot og P30 mil ang nasakiyo sa duha ka mga tulisan nga mitulis sa salesman sa usa ka soft drink company nga naghatud sa mga produkto niini dungan ang pagpangolekta sa barangay Punete lungsod sa Carmen niadtong Miyerkules sa alas 5:00 sa hapon.

Ang biktima mao si Rufino Gica, 46, molupyo sa Subangdaku siyudad sa Danao samtang ang duha ka mga tulisan gihulagway lang nga mga batan-on ug nagsakay sa usa ka motorsiklo nga kolor puwa apan way plate number.

Matud ni SPO2 Simplicio Gibo, desk officer sa Carmen Police dihang nahinabi sa Banat News kalit gibabagan sa mga tulisan si Gica ug gitionan sa nag-angkas og armas dayong deklarar og tulis.

Tungod sa kahadlok wala makalihok ang biktima ug wala na mosukol pagbira sa bag nga gisudlan sa koleksiyon nga moabot og P30 mil dayon daling mibalik sa motorsiklo ang tulisan ug miikyas.

Ang kapolisan padayon pa sa paghimo og imbestigasyon sa nahitabo apan kini nadugang sa listahan sa mga insidente sa pagpanulis sa mga ahente sa nagkadaiyang mga kompanya nga hangtud karon wala pa mangasulbad. (BANAT NEWS)