CEBU, Philippines - Mokabat sa 49 ka parisan sa managhigugmaay nga nagkapuyo na sulod sa dugay na nga katuigan ang hingpit na nga nahimong magtiayon pinaagi sa mass wedding nga gipahigayon sa National Shrine of St. Joseph sa barangay Centro, dakbayan sa Mandaue kagahapon sa buntag.
Ang mass wedding nga nahimo na nga kabahin sa mga kalihokan human sa kasaulogan sa tinuig nga pangilin sa dakbayan gipasiugdahan sa mga Non governmental Organization nga Kaabag Inc. ug Cultural Historical Sports and Tourism (CHEST) Foundation.
Sa nasayran nga mokabat sa 51 kaparisan sa mga nagpuyopuyo nga magtiayon ang nagpalistang magpakasal apan miatras ang duha tungod kay ang usa wala makakompleto sa rekisitos samtang ang ikaduha wala magkasabot sa kolor sa suoton sa bride ug sa groom.
Si Mayor Jonas Cortes ug ang unang ginang sa dakbayan nga si Sarah Walker Cortes maoy maninong ug maninay uban nila Bise Mayor Glenn Bercede, Konsehal Lollipop Ouano Dizon, Konsehal Elstone Dabon, Kapitan Ernie Manatad sa barangay Subangdaku ug Kapitan Nelson Rubio sa barangay Umapad.
Si Daisy Otarra sa Kaabag Inc. miingon nga migahin sila og P200 mil sa maong mass wedding. (BANAT NEWS)