Smart cards ihatag sunod semana - LTO

CEBU, Philippines -  Gipaabot nga hingpit nang madawat karung sunod semana sa mga PUJ drayber dinhi sa Sugbo ug tibuok Central Visayas ang fuel subsidy sa gobiyerno ubos sa Pantawid Pasada Program ni Presidente Benigno “Noynoy” Aquino III.

Kini human gibutyag ni Land Transportation Office (LTO-7) director Raul Aguilus nga gitakda na niyang dawaton kagahapong adlawa ang mga Smart cards nga maoy gamiton sa mga drayber aron mahatagan og diskwento sa ilang pagpatubil sa mga gasolinahan.

Tumong niini nga dili kaayo mabug-atan ang transport sector sa nagsunod nga umento sa presyo sa produktong petrolyo.

Apan gibutyag ni director Aguilus gitakda pa silang magtagbo sa kadagkuan sa Land Transportation Franchising and Regulatory Board (LTFRB)-7 ug Department of Energy (DOE)-7 aron pagtuki sa mga pamaagi nga sagupon alang na sa pag-apod sa mga Smart cards.

Hinuon giklaro ni Aguilus nga ang DOE-7 maoy direktang mo-apod sa maong mga Smart cards sa mga lehitimong operators ug ang operators na maoy moapod niini sa ilang mga drayber.

Subling giklaro ni Aguilus nga kadto lang mga lehitimong operator ang makabenepisyo sa mga Smart cards. (EIM) (BANAT NEWS)