CEBU, Philippines - Ang pamilya ug kahigalaan ni anhing Manuel Ting nangandoy nga masikop gayud ang mibanhig patay sa Sugboanong hotelier.
Karong Hunyo 22, 2011 mao ang sumad sa adlaw sa pagkamatay ni Ting kinsa gipusil samtang luwan sa iyang sakyanan didto sa Barangay Tisa, ning dakbayan sa Sugbo sa miaging tuig.
Ang upat ka anak lalaki sa tag-iya sa Cebu Parklane International Hotel, nagkanayon sa Banat News nga gibati sila og gamayng kadismaya sa hinay nga dagan sa kasulbaran sa pagpatay sa ilang amahan.
Bisan pa og nadakpan na ang suspetsadong gunman nga si Ruel Velez, dili gihapon kontento ang mga anak ni Ting tungod kay hangtud karon wala pa gihapon mailhi kung kinsa ang “mastermind” sa maong krimen.
“Kung mo-ingun sila nga solve na ang kaso, dili na tinuod tungod kay gunman ra ang nadakpan ug gusto namo uban sa mga suod nga higala ni daddy nga masakpan na gyud kong kinsa ang mastermind,” matud pa sa anak ni Ting.
Giklaro hinuon nila nga misalig sila sa kapabilidad sa kapolisan nga musolbad sa kaso, apan gihangyo sa mga gibiyaang anak ni Ting nga paspasan ang pagsulbad sa kaso aron makuha na sa ilang amahan ang tinuoray nga hustisya.
“Kahibawo man mi nga naglihok sila pero amo lang ihangyo nga ipa-double time,” sigun pa sa anak ni Ting. “Gusto usab namo ipakita nga kami nga mga anak ni Manuel Ting padayong naglihok ug nangita og justice.”
Gawas sa lima ka mga saksi sa kampo ni Ting, gibutyag usab sa mga managsuon nga aduna nay gihatag nga lead ang kapolisan kung kinsa ang mastermind, apan gusto nila nga konkreto ang mga ebidensiya alang sa seguradong pagkapriso niini. (BANAT NEWS)