Misusi sa kasikas napusilan sa dughan

CEBU, Philippines -  Nalungag ang dughan sa usa ka mag-uuma human makaangkon og samad pinusilan gawas sa pinuy-anan niini aron unta pagsusi sa kasikas sa gawas sa sitio Oyong barangay Hingatmonan lungsod sa Balamban alas 8:45 niadtong Martes sa gabii.

Ang biktima mao si Victoriano Obejero,35, nagpuyo sa nahisgutang lugar. Samtang wala pa matumbok sa        kapolisan ang responsable sa pagpamusil.

Matud ni PO3 Julius Obanana sa Balamban Police Station dihang nahinabi sa Banat News subay sa imbestigasyon ang biktima kauban sa kapuyo niini nga si Fedita ug duha nila ka mga anak ang nag-asikaso alang sa ilang panihapon niadtong higayuna dihang nakadungog og kasikas ang biktima sa gawas nga bahin.

Daling nigawas ang biktima apan sa iyang paggawas sa pultahan kalit nga mipaka ang lanog nga buto sa armas ug dangtan og pipila ka gutlo nahibaw-an nga nalup-og na ang biktima nga nakaangkon og samad pinusilan sa dughan nga milapos sa bukobuko.

Daling gidala sa mga kabanay ang biktima sa Balamban District Hospital samtang ang mamumuno daling nakaikyas.

Wala pa matino sa kapolisan ang motibo sa maong krimen. (BANAT NEWS)