Lapulapu maningil sa P1.4b utang sa MCIAA

CEBU, Philippines -  Gitinguha sa lokal nga kagamhanan sa dakbayan sa Lapulapu nga makolekta niini ang balor P1.4 bilyong utang sa Mactan Cebu International Airport Authority alang sa katumanan sa mga dagkong proyekto niini.

Kini ang giluwatang pamahayag ni Lapulapu City Mayor Paz Radaza uban sa mga sakop sa media sa iyang buhatan.

Matod pa ni Radaza nga dako kaayo og ikatabang ang maong kantidad ngadto sa ilang mga priority projects sama sa dugang gahin sa Special Education Fund o SEF, road repairs and maintenance ug uban pang proyekto niini.

Atol sa congressional hearing sa milabay’ng Mayo 8 diin ang tanang opisyal sa dakbayan sa Lapulapu mipakita sa buhatan sa kongreso mipadayag sila sa ilang tinguha nga makolekta ang buhis nga sukad pa niadtong tuig 1998 gikan sa MCIAA.

Ang maong buhis gikatahong gikan sa Real Property Tax ug Business Tax sa MCIAA ngadto sa dakbayan sa Lapulapu.

Gumikan niini nunot sa tinguha ni Lapulapu City Lone District Cong. Arturo “Boy” Radaza nga amendahan ang charter sa MCIAA Board nga magbutang og usa ka lingkuranan o representasyon sa board gikan sa dakbayan sa Lapulapu giapil usab niini ang pagpasabot ngadto sa mga magbabalaod ang kamahinungdanon sa pagkolekta sa buhis nga dugay nang wala mabayri sa MCIAA.

Samtang pipila ka mga opisyal sa MCIAA ang nagpakahilom una sa maong isyu sanglit anaa pa sa Korte Suprema ang kaso nga gipasaka sa dakbayan sa Lapulapu batok sa MCIAA gumikan sa legalidad sa pagkolekta og buhis ngadto sa MCIAA.

Kahinumduman nga sa milabay’ng 2005 ang dakbayan sa Lapulapu mipasaka og kaso batok sa MCIAA human nga napakyas ang naulahi sa pagbayad sa ilang buhis balor P568 milyones ngadto sa siyudad ug bisan pa sa gihimong protesta ug rally nga gihimo sa City Hall sa tugkaran sa MCIAA nagmagahi gihapon kini sa pagbayad sa ilang obligasyon hinungdan nga misantop kini sa pagpasaka og kaso.

Matud pa ni Radaza nga dako kaayo ang alkanse sa dakbayan sa Lapulapu diin ang 1/5 sa kinatibuk-ang yuta sa dakbayan sa Lapulapu gipanag-iya kini sa MCIAA.

Sa ulahing assessment sa buhis sa MCIAA sukad niadtong tuig 1998 hangtod karon gibanabanang mokabat na sa P1.4 bilyones ang bayranan sa Real Property Tax ug Business tax sa MCIAA.(EIM) (BANAT NEWS)